Em Hugo sy letschti Fasnacht!

Dr Rudin Hugo hett allem aa
e rächt e gueti Naase gha,
won är vor fimedryssig Joor beschliesst,
as är en aigni Clique miesst
gründe und e Waage mache,
mit Waggis, Räppli und all däne Sache,
wo halt e Waage e so macht!
Und siehe da: es wird vollbracht!

D Route-Bysser sinn geboore worde
e glatti und e tolli Horde
Männer wo als Waggis lache
und intrigiere, ebbe: Fasnacht mache!

Hunderti vo guete Gschichte
waiss dr Hugo hitte z brichte,
wien är und sini Waggis-Manne,
während dr Waage-Fasnacht amme,
dr Plausch gha hänn, e jeede Daag,
und gfeschtet hänn – in jedere Laag!

Är sait drum hütt no hindedryy:
«Friehner isch das anderscht gsi»!

Obwohl är lengscht nimm Obmaa isch,
sitzt är no immer bi uns am Disch,
me hett en gärn, är gheert derzue,
und losst die Junge schön in Rueh,
är losst si ihri Sache mache,
und duet halt denn im Stille lache,
wenns nid so lauft wie s die gärn hänn,
und denn doch e Root vom Hugo wänn.

Jetzt isch dr Schuss aber plötzlig duss:

Dr Hugo macht mit allem Schluss!
Das wird – sait är, und s drait em fascht dr Maage –
my letschti Fasnacht – uff em Waage.
Und wills en Ungligg nid als Solo git:
nimm y zwai anderi grad no mit!

Jetzt hänn die Junge dr Salat!
Jä sinn die für die Zyt paraat
wo non em Hugo denn wird ko?
(Das macht si wirgglig gar nid froh!)
Si wärde kämpfe, liide, dängge
Und mängmool e paar Gedangge schängge
An d Zyt mit Hugo und pletzlig wüsse sy:
«Friehner isch alles besser gsi!»

Liebe Hugo, liebe Frind!
Es git hunderttausig Grind
um Dir Dangge z saage fir die Zyt
Wos ohni Di halt nimmi gitt.

Drum singe mir im Chor fir Di:
«Friehner isch alles … Hugo gsi!

Dini Routebysser Frind 2020!

Mit em Hugo fyyre au dr Bruno Gardelli und dr Däni Meyer die letschti Fasnacht uff em Waage. Mr wäärde au die vermisse und hoffe, ass si nid sofort und ganz uss unserem Fasnachtslääbe verschwinde. Merci für Euri Arbet und für d Fründschaft!