Fasnachts Zeedel 2024 (PDF)

Sujet: Passé!

Hesch friehner mit emene Kätzli welle
meh als numme Margge zelle
hesch lo verlutte: „Kumm, bisch derbyy?
Ich lad Di in d Staine ins Kino yy!“

In Gedangge hesch afo plaane
„Wie kumm ych an das Maitli aane?
Wie soll y my denn nur gebäärde
Ass die zu miner Frau ka wäärde?“

Scheen agleggt bisch derno in d Staine
Und hesch denn deerte irgendnaime
Anere Kasse lo verkinde:
I hätt gärn zwai dunggli Blätz – ganz hinde.

No de Vorfilm und Reglaame
Hesch denn bi Dinere Härzensdaame
Zerscht emoll an ihre Ellebooge glängt.
Woruff sie zärtligg ihri Auge sänggt
Und sait: „Hesch zwenig Blatz? No rutsch y halt“
Und scho isch die erschti Chance kalt.

Im Verlauf  vom Film „Das Dschungelbuech“
Woggsch denn keck dr zwait Versuech
Und startisch sone Kuss-Attagge
In Richtig uff ihri linggi Bagge.
Kurz vor dr Landig – kaschs kuum fasse
Goots Liecht aa – und s git Pause-Glasse!

Denn halt speeter im zwaite Dail
Also langsam fiehlschti zümftig …. zwääg
Duet Di Hand in Richtig ihre Bruschtkoorb zaige
Und Di Gfiehl derbyy isch zimmlig aige
Grad willsch uff däne zwai hibsche Hiigel lande
Sait si: „I wett no Popcoorn, bisch yverstande?”

Do sott doch noch öppis goo, jo nundefaane
Jetzt muess gschwind e neui Taggtig aane!
Du schwingsch Di Bai jetzt richtig rächti Sytte
Will dräffe wotsch s Kneu vo Dinere Aphrodite
Jetzt e  bitz dra umme riibe
zärtligg ohni grad z iberdriibe.
Du ribsch und straichlisch und duesch ufs beschti hoffe.
Bis de merggsch: Du hesch jo numme s Stuehlbai droffe.
Und erscht ganz am Schluss – s isch scho fascht häll
Do gits no e kurze Schmutz – ganz schnäll!
Aber ihr laufet baidi uss em Kino uuse
Als hätte Dir vor lutter ummeschmuuse
Kai Sekunde vom däm Film do gschnallt
Und sinn jetzt hoffnigsloos verknallt.

Wotsch hütte mit Dim Kätzli schmuuse
Muesch ins Stüggi oder nach Lörrach uuse
Will in dr Staine isch – herrjee
Die Heerligkait scho lang: Passé!

D Kino-Killer in dr Staine
Kasch unter “Streaming” guet veraine:
Si haisse Netflix, Prime und Sky
Disney, DAZN – s isch einerlei
De kasch e jeede Film go kaufe
Und muesch nid emoll in d Staine laufe
Dehaim im Näscht mit Nüss und Bier
Ziesch Folge yyne, vo ains bis vier!
Und liggt Di Gschpuusi au derbyy
Muesch nid öppe uffgreggt syy
Die schlooft scho lang und dräumt dervoo
si wuurd mit Dir ins Kino goo.

Mir Route-Bysser ehre mit däne Vote
D  Staine-Kinos, die scheene, doote!

Jetzt gits in däre Kinostroos halt Clubs und Bars und Baize
Und mängmool sait en alte Maa: „Du Schatz, es wuurd mi raize,
mit Dir nomoll ins Dschungelbuech, zwai dunggli Blätz ganz hinde…“
Und denne gschesch die zwai Hand in Hand in die dunggli Gass verschwinde.